پاکستان سٹیل ملز کی بندش سے نجی ملوں کی چاندی تعمیراتی خام مال مہنگا ہونے سے کم لاگت رہائشی سکیم شدید متاثر

کراچی(این این آئی)تعمیراتی سرگرمیوں میں استعمال ہونے والے خام مال کی قیمتوں میں اضافے سے بے گھر افراد کیلئے اعلان کردہ وزیر اعظم کی کم لاگت رہائشی اسکیم غیر موثر ثابت ہورہی ہے۔ تفصیلات کے مطابق وزیر اعظم کی جانب سے ملک کے بے گھر افراد کیلئے
کم لاگت رہائشی اسکیم کے اعلان کے بعد سے تعمیراتی سرگرمیوں میں استعما ل ہونے والے خام مال کی قیمتوں میں مسلسل اضافے کا رجحان ہے اور گزشتہ چند ماہ کے دوران سریا،سیمنٹ اور اسٹیل کی دیگر مصنوعات کی قیمتوں میں کئی گنا اضافہ ہوچکا ہے ۔اس ضمن میں بعض ذرائع کا کہنا ہے کہ اسٹیل مل کی بندش کے بعد سے نجی اسٹیل ملوں کی چاندی ہوگئی ہے اور انہوں نے اسٹیل مصنوعات من مانے داموں پر فروخت کرنا شروع کردی ہیں،سی پیک پراجیکٹ اور کم لاگت رہائشی اسکیم کے باعث اس وقت ملک میں تعمیراتی اور انجینئرنگ کے شعبوں میں اسٹیل کی تیار کردہ مصنوعات کی مانگ بڑھ گئی ہے جبکہ اسٹیل مل کی بندش سے نجی اسٹیل ملوں نے اس موقع کا بھرپور فائدہ اٹھاتے ہوئے اپنی مصنوعات کی قیمتوں میں کئی گنا اضافہ کردیا ہے ،ذرائع نے اس ضمن میں مزید بتایا کہ اسٹیل مل کی بحالی سے نہ صرف آئرن و اسٹیل مصنوعات کی در آمدات کی مد میں قیمتی زرمبادلہ کے خرچ میں40فیصد کی کمی ممکن ہے بلکہ اسٹیل مل کی بحالی سے 12ہزار سے زائد افراد کو روزگار بھی میسر آسکے گا اور نجی اسٹیل ملوں کی اجارہ داری بھی ختم ہوسکے گی،اسٹیل مصنوعات کے ساتھ سیمنٹ ،رنگ اور تعمیرات میں استعمال ہونے والے دیگر خام مال کی قیمتوں میں بھی گزشتہ چند ماہ کے دوران ہوشربا اضافہ دیکھا گیا ہے جس کے باعث بے گھر افراد کیلئے اپنے گھر کے حصول کاخواب شرمندہ تعبیر نہ ہونے کا خدشہ ہے ۔

Leave a Reply

Your email address will not be published. Required fields are marked *