آئی ایم ایف سے رقم ملنے کے بعد ملکی ذخائر تاریخ کی بلند ترین سطح پر پہنچ گئے

اسلام آباد(این این آئی، آن لائن)آئی ایم ایف کی جانب سے 2 ارب 75 کروڑ ڈالرز کی امدادی رقم پاکستان کو موصول ہونے سے اسٹیٹ بینک ذخائر20ارب30کروڑ اور ملکی مجموعی ذخائر27ارب41کروڑ ڈالرتک پہنچ گئے۔اسٹیٹ بینک کے مطابق آئی ایم ایف کی جانب سے منظور کردہ رقم اسٹیٹ بینک کو موصول ہوگئی،ذخائر تاریخی بلند
ترین سطح پر پہنچ گئے،اسٹیٹ بینک کے ذخائر 20 ارب 30 کروڑ ڈالرز سے زائد کی سطح پر پہنچ گئے ہیں،اسٹیٹ بینک اعلامیہ کے مطابق پاکستان کے بہتر فیصلوں اور آئی ایم ایف پروگرام پر عملدرآمد کے نتیجے میں رقم پاکستان کو دی گئی،رقم کا آئی ایم ایف کے قرضوں سے کوئی تعلق نہیں،فنڈ موصول ہونے کے بعد ملکی زرمبادلہ کے ذخائرمیں اضافہ ہوا ہے،اسٹیٹ بینک کا کہنا ہے کہ ملکی مجموعی ذخائر کی مالیت 27ارب 41کروڑ ڈالر ہوگئی۔دوسری جانب عالمی مالیاتی فنڈ (آئی ایم ایف) نے افغانستان سے اپنے عملے کے بحفاظت انخلاء پر پاکستان کا شکریہ ادا کرتے ہو ئے کہا ہے کہ مشکل گھڑی میں افغانستان سے آئی ایم ایف کے عملے اور ان کے خاندانوں کے بحفاظت انخلا پرمشکور ہیں ۔ آئی ایم ایف کی منیجنگ ڈائریکٹر کرسٹیلینا جارجیوا نے وزیر اعظم عمران خان کو مراسلہ بھیجا ہے جس میں انہوں نے افغانستان سے ادارے کے عملے کے انخلاء کے حوالے سے پاکستان کے کلیدی کردار کو دادِ تحسین پیش کیا ہے۔
کرسٹیلینا جارجیوا نے وزیرِ اعظم عمران خان اور پاکستانی عوام کے لئے نیک خواہشات کا اظہار کیا ہے، انہوں نے وزیر خارجہ، وزیر خزانہ، وزیر دفاع اور گورنر اسٹیٹ بینک کے کردار کی بھی تعریف کی ۔خط میں کرسٹیلینا جارجیوا نے کہا ہے کہ مشکل گھڑی میں افغانستان سے آئی ایم ایف کے عملے اور ان کے خاندانوں کے بحفاظت انخلا پرمشکور ہوں، پاکستان کی جانب سے اعلیٰ سطح پر کی جانے والی کوششیں کلیدی اہمیت کی حامل ہیں، پاکستان اور فنڈ کے مابین پارٹنرشپ پر مشکور ہیں اور اس تعاون کے تسلسل کے متمنی ہیں ۔

Leave a Reply

Your email address will not be published. Required fields are marked *