بھارت میں بھی گرمی کا 90 سالہ ریکارڈ ٹوٹ گیا

اسلام آباد (ما نیٹر نگ ڈیسک/این این آئی) دلی میں گرمی نے انگریز دور کا ریکارڈ توڑ دیا ہے ۔ آج دلی شہر میں جتنی گرمی پڑی اتنی پچھلے 90 برس میں کبھی نہیں پڑی ۔ بھا رتی میڈیا کے مطابق آج دلی کے علاقے صفدر جنگ میں زیادہ سے زیادہ درجہ حرارت 43.6 اور کم سے کم 32 ڈگری سینٹی گریڈ ریکارڈ کیا گیا۔نجی ٹی وی ٹوئنٹی فور کے مطابق یہ گزشتہ 90 برس میں ریکارڈ ہونے

والا سب سے زیادہ درجہ حرارت ہے۔اس سے قبل یکم جولائی 1931 کو دلی میں 45 ڈگری سینٹی گریڈ گرمی پڑی تھی۔ اس کے بعد زیادہ سے زیادہ درجہ حرارت 2 جولائی 2012 کو 43.5 ڈگری ریکارڈ کیا گیا تھا تاہم یکم جولائی 2021 کو پڑنے والی گرمی نے 90 سالہ ریکارڈ توڑ دیے ہیں۔ بھارت کے محکمہ موسمیات کا کہنا ہے کہ شمالی ریاستوں بشمول پنجاب، ہریانہ، دلی ، شمالی راجستھان اور اتر پردیش میں اگلے دو روز تک ہیٹ ویو جاری رہے گی۔اس لئے عوا م اپنے لئے احتیاطی تدابیر اختیا ر کر لیں۔دوسری جانب کینیڈا کے حکام کا کہنا ہے کہ ملک میں ریکارڈ توڑ گرمی کی لہر کے دوران سینکڑوں اموات کی ملنے والی اطلاعات میں سے زیادہ تر اموات گرمی کے باعث ہونے کا شبہ ہے۔کینیڈا کے صوبے برٹش کولمبیا میں ہی صرف گذشتہ پانچ روز کے دوران 486 اموات ہوئی ہیں جو کہ اس عرصے کے دوران معمول سے 195 فیصد زیادہ شرح ہے۔خیال رہے کہ سرد ترین ملک کینیڈا میں قیامت خیز گرمی سے نظامِ زندگی مفلوج ہو گیا ہے، اچانک اور غیر معمولی گرمی سے کینیڈا کے صوبے برٹش کولمبیا میں جمعے سے اب تک مرنے والوں کی تعداد 233 ہو گئی۔غیر ملکی خبر رساں ادارے کے مطابق حکام نے اموات میں اضافے کا خدشہ ظاہر کیا ہے۔ تاریخ میں پہلی بار سرد ترین علاقے میں درجہ حرارت 49 اعشاریہ 5 ڈگری سینٹی گریڈ تک پہنچا ہے۔ حکام کا کہنا ہے کہ کینیڈا، گرمی اچانک بڑھنے سے 134 افراد ہلاک ہو گئے ہیں ۔ رپورٹس کیمطابق صرف برٹش کولمبیا کے شہر وینکوور میں 69 اچانک اموات رپورٹ ہوئیں۔حبس اور گھٹن سے دم توڑ جانے والے افراد میں زیادہ تر بوڑھے اور بیمار شامل ہیں۔سرد ترین علاقوں میں گرمی سے ایئر کنڈیشنر کی مانگ بڑھ گئی۔موسمیاتی تبدیلیوں کے باعث دنیا بھر میں گرمی کی حدت بڑھتی جارہی ہے اور اس کے اثرات اب واضح طور پر نظر آنے لگے ہیں۔ امریکہ، یوروپ، کینیڈا اور خلیجی ممالک کو اس وقت شدید گرمی کی لہر کا سامنا ہے۔ سرد ماحول میں بسنے والےیوروپی اور امریکی باشندوں کے لئے شدید گرمی ایک عذاب ہے۔نجی ٹی وی کے مطابق رواں سال دنیا میں درجہ حرارت نے نئے ریکارڈ قائم کئے ہیں۔ کم از کم 23 ممالک میں درجہ حرارت 50 ڈگری سینٹی گریڈ سے اوپر چلا گیا ۔

Sharing is caring!

Categories

Comments are closed.