مسلح افواج کی مشترکہ پریڈکل ہوگی دفاعی اور فوجی قوت کا بھر پور مظاہرہ کیا جائیگا جڑواں شہروں میں موبائل سروسز بند رہیں گی ‎

اسلام آباد ( آن لائن)یوم پاکستان کی مناسبت سے مسلح افواج کی مشترکہ پریڈ آج جمعرات شکر پڑیاں گرائونڈ میں ہوگی ۔صدر مملکت عارف علوی اس پریڈ کے مہمان خصوصی ہوں گے ۔اس موقع پر پاکستان کی دفاعی اور فوجی قوت کا مظاہرہ بھی کیا جائیگا ۔موسم کی خرابی کی وجہ سے

مشترکہ پریڈ23 مارچ کو منعقد نہیں ہو سکی تھی ،آج ہونے والی پریڈ کی خاص بات پاکستان کے جدید ترین دفاعی نظام کی نمائش بھی ہوگی جبکہ ائیر چیف مارشل ظہیر احمد بابر پاکستان ائیر فورس کے لڑاکا طیاروں کی فلائی پاسٹ کی قیادت کریں گے ۔شکر پڑیاں گرائونڈ میں ہونے والی اس مشترکہ پریڈ میں وفاقی وزرائ،غیر ملکی سفارت کار ،شہداء کے لواحقین اور دیگر مہمانوں کی بڑی تعداد شرکت کرے گی تاہم سب کے لئے لازمی قرار دیا گیا ہے کہ کورونا وائرس بچائو کے لئے ایس او پیز کی پابندی کریں ۔کورونا کا شکار ہونے کی وجہ سے وزیر اعظم عمران خان کی اس پریڈ میں شرکت کا امکان نہیں ہے۔تینوں مسلح افواج کے سربراہان چیئرمین جائنٹ چیفس آف سٹاف کمیٹی بھی اس موقع پر موجود ہوں گے ۔سکیورٹی کے غیر معمولی اقدامات کئے گئے ہیں جبکہ ٹریفک کے بھی متبادل انتظامات کئے گئے ہیں ۔دفاعی اور فوجی سازوسامان کی نمائش سمیت چاروں صوبوں ،آزاد کشمیر اور گلگت بلتستان کے فلوٹس بھی مشترکہ پریڈ کا حصہ ہیں جن پر پاکستان کی ثقافت کے رنگ نمایاں ہیں اور قومی و علاقائی گلوکار ان فلوٹس پر اپنے فن کا مظاہرہ بھی کریں گے ۔اس کے علاوہ پاک فضائیہ کی شیردل ٹیم اپنی فضائی کرتبوں کا مظاہرہ بھی کرے گی جبکہ سپیشل سروسز گروپ کے کمانڈوز فری فال جمپ کا مظاہرہ کریں گے ۔

Sharing is caring!

Categories

Comments are closed.